Աստղակերպը գնահատվել է 10,000 կվադրիլիոն դոլար

12 Ապրիլ, 2021

Լուսանկարը՝ Rubin/NASA/JPL-Caltech 

Փսիքե աստղակերպը, որը պտտվում է Մարսի ու Յուպիտերի միջև, տեսականորեն կարող է փլուզել միջազգային շուկաները։ Այն բառացիորեն լցոնված է օգտակար հանածոներով՝ երկաթ, նիկել, նաև բազմաթիվ հազվագյուտ մետաղներ, մասնավորապես՝ ոսկի, պլատին, կոբալտ, իրիդիում, ռենիում։ Ընդ որում՝ այնպիսի քանակներով, որ դրանց մոտավոր արժեքը կոպիտ հաշվարկներով կարող է կազմել մոտ 10,000 կվադրիլիոն ԱՄՆ դոլար, ինչը գերազանցում է համաշխարհային տնտեսության արդի ծավալը։

Փսիքե աստղակերպը մարդկությանը վաղուց է հայտնի։ Այն հայտնաբերվել է 1852 թվականի մարտի 17-ին Անիբալե դե Գասպարիսի կողմից Նեապոլում և կոչվել է հոգու աստվածուհու անունով (ըստ հին հունական դիցանբանության)։ Մինչ այժմ, սակայն, հայտնի էր միայն, որ, ի տարբերություն այլ աստղակերպերի, որոնք բաղկացած են քարից ու սառույցից, Փսիքեն «մետաղական» մարմին է։

Եվ ահա ՆԱՍԱ-ի գիտնականներին հաջողվել է ուսումնասիրել աստղակերպը երկու կողմերից և, ինչն առավել կարևոր է՝ ոււլտրամանուշակագույն լույսի տակ, ինչն էլ հնարավորություն է ստեղծել ստանալ աստղակերպի առավել հստակ պատկերն ու գնահատել նրա «արժեքը»։

Աստղակերպի գերճշգրիտ նկարագիրն ու ծագումը կպարզվեն արդեն 2022 թվականին, երբ ՆԱՍԱ-ն անօդաչու տիեզերանավ կգործարկի այն ուսումնասիրելու համար։

Փսիքեն մեր արեգակնային համակարգի «աստղակերպերի գոտու» ամենահոծ ու մեծածավալ աստղակերպն է։ Այն 190 կմ տրամագծով կարտոֆիլի ձև ունեցող մարմին է։

Աղբյուրը՝ USA Today

Այլ լուրեր