Միկրոպլաստիկը թափանցում է մեր ուղեղ առողջության համար առայժմ անհայտ հետևանքներով, նշված է նոր հետազոտությունում։ Մարդիկ ամեն օր շնչում կամ կլանում են պլաստիկի մնացորդների մանր մասնիկները, որոնք հայտնի են որպես միկրոպլաստիկ և նանոպլաստիկ։

Գիտնականները վաղուց էին կասկածում, որ դրանք կարող են հաղթահարել հեմատոէնցեֆալիկ պատնեշը, որը գործում է որպես զտիչ կենտրոնական նյարդային համակարգի և օրգանիզմի մնացած մասերի միջև՝ ուղեղը պաշտպանելով թունավոր նյութերից և նրան մատակարարելով սննդարար նյութեր։

Նյու Մեքսիկոյի համալսարանի (ԱՄՆ) հետազոտողներն ուսումնասիրել են մարդու ուղեղի 52 հետմահու նմուշներ, այդ թվում 28-ը՝ վերցված 2015թ., և 24-ը՝ 2024թ.։ Բոլոր նմուշներում հայտնաբերվել է միկրոպլաստիկ, որի խտությունը 50%-ով ավելի բարձր է եղել ավելի ուշ ժամանակահատվածի նմուշներում։

Բացի այդ, ուղեղում հայտնաբերվել է միկրոպլաստիկի ավելի բարձր մակարդակ, քան այլ օրգաններում, ինչպիսին են երիկամներն ու  ու լյարդը։ Գիտնականներն ուսումնասիրել են դեմենցիայով տառապող 12 մարդկանց ուղեղնուհ ու հայտնաբերել նրանց ուղեղում միկրոպլաստիկի ավելի մեծ խտություններ, քան այդ ախտորոշումը չունեցող մարդկանց մոտ։

Ուղեղի նմուշներում հայտնաբերված պլաստիկի մասնիկների մեծ մասը պոլիէթիլենից է եղել, որը լայնորեն օգտագործվում է սննդի ու խմիչքի փաթեթավորման, ինչպես նաև շամպունի շշերի և այլնի մեջ։

Հետազոտության հեղինակները նշել են, որ ուղեղի նմուշները հավաքվել են ԱՄՆ տարբեր մասերում, ինչը կարող է ազդել արդյունքների վրա։

Նրանք նաև ընդգծել են, որ ավելի շատ հետազոտություններ են անհրաժեշտ՝ պարզելու համար, թե արդյոք ուղեղում միկրոպլաստիկները իրականում առողջական խնդիրներ են առաջացնում:

Աղբյուրը՝ Euronews Health

Պատկերը՝ Euronews/Canva