ԱՄՆ-ում իրականացվել են միջուկային հրթիռային վառելիքի առաջին փորձարկումները իրականին մոտ պայմաններում։ General Atomics Electromagnetic Systems (GA-EMS) ընկերությունն արդեն հայտարարել է, որ իր վառելիքի հավաքակազմերը հաջողությամբ անցել են ջերմային և ջրածնի կայունության թեստեր մինչև 2326°C ջերմաստիճանում:

Առաջին փորձարկումը տևել է 20 րոպե, ինչը համապատասխանում է ողջ ուժով աշխատող շարժիչին։ Հավաքակազմերը մնացել են անվնաս։ Փորձարկումներն անցկացվել են NASA-ի Մարշալի անվան տիեզերական թռիչքների կենտրոնում (MSFC):

Վառելիքի հավաքակազմերը ենթարկվել են ջեռուցման վեց ցիկլերի, որոնցից յուրաքանչյուրը մոդելավորում է շարժիչի աշխատանքը ամբողջ հզորությամբ: Ջրածինը, որը տաքացվում էր մինչև 2326 °C, մղվում էր խցիկի մեջ: Վառելիքը ցույց է տվել դիմադրություն էքստրեմալ պայմաններին, ինչը նրան հարմար է դարձնում միջուկային ջերմային շարժիչների համար:

GA-EMS ընկերության նախագահ Սքոթ Ֆորնին ընդգծել է, որ այս փորձարկումները կարևոր քայլ են հեռավոր տիեզերքի համար հուսալի շարժիչներ ստեղծելու տեսանկյունից: Դրանք կկարողանան նվազեցնել դեպի Մարս թռիչքի ժամանակը 6-7 ամսից մինչև 45 օր: Սա զգալիորեն կնվազեցնի անձնակազմի առողջությանը սպառնացող վտանգները և, ընդհանուր առմամբ, տիեզերական առաքելությունները կդառնան ավելի անվտանգ և արդյունավետ:

Աղբյուրը՝ IFL Science

Պատկերը՝ General Atomics