Գիտնականները մտադիր են Անտարկտիդայի սառույցի տակ մի քանի կիլոմետրանոց հորատանցք բացել՝ հույս ունենալով լուծել 1,5 միլիոն տարվա առեղծվածը։ Այդ նպատակով ստեղծվում է Սառույցի ամենահին հետազոտությունների կենտրոնը (COLDEX):

Հետազոտությունը կգլխավորի Օրեգոնի համալսարանը (ԱՄՆ): Աշխատանքին կմասնակցեն առաջատար փորձագետներ, ինչը թույլ կտա հարուստ գիտելիքներ հավաքել Երկրի կլիմայական համակարգի մասին, որոնք այնուհետև կօգտագոչծվեն կլիմայի փոփոխության և դրա ազդեցությունների դեմ պայքարի ջանքերն առաջ մղելու համար:

Ըստ գիտնականների՝ հետազոտության նպատակն է պարզել Երկիիր մոլորակի «վարքագիծը», երբ այն ավելի տաք է, քան վերջին միլիոն տարվա ընթացքում: Այդ նպատակով պետք է գտնել ու հավաքել խորը գնացող սառցե միջուկներ:

Ներկայում Անտարկտիկայի սառույցի ամենահին նմուշը, որ ունեն գիտնականները, 800.000 տարեկան է: Միևնույն ժամանակ, կլիմայական համակարգի բնութագրերը տարբեր են 800 000 տարի առաջ և 1,5 միլիոն տարի առաջ, ուստի սառցաշերտի հորատման նոր նախագիծը կտրամադրի նոր՝ առավել լիարժեք տվյալներ: 

Փորձագետները հույս ունեն գտնել շատ ավելի հին սառցաբեկորներ, գուցե նույնիսկ 3 միլիոն տարեկան, քանի որ ըստ նախնական ուսումնասիրությունների՝ Անտարկտիդայի շրջակայքում կան սառցադաշտի ավելի հին հատվածներ:

Ըստ գիտնականների՝ այս սառույցը և դրա մեջ պարուրված օդն աննախադեպ տեղեկություններ կտրամադրեն այն մասին, թե ինչպես են ջերմոցային գազերն ու կլիման փոխկապակցված ավելի տաք կլիմայական պայմաններում և կօգնեն պարզել, թե ինչն է վերահսկում Երկրի կլիմայական համակարգի երկարաժամկետ ռիթմերը:

Նշվում է, սակայն, որ սառցե միջուկների հորատումը չափազանց բարդ ու թանկարժեք գործընթաց է, որի իրականացումը կարող է երկար տարիներ տևել: Կլինեն բազմաթիվ մոդելավորումներ, կմշակվեն նոր գործիքներ, որոնք կօգնեն որոշել որոնման առավել համապատասխան հատվածները։  

Աղբյուրը՝ Daily Express

Պատկերը՝ GETTY